យន្តហោះយោចិន២៤គ្រឿង​ហោះ​ឆ្វែល​​នៅជិតកោះ​​តៃ​វ៉ាន់​

តៃវ៉ាន់បានប្រទះឃើញយន្តហោះយោធាចិនចំនួន២៤គ្រឿង​ហោះ​ឆ្វែលនៅជិតកោះរបស់ខ្លួន ស្របពេលដែលនាវាចម្បាំងរបស់កាណាដាបានឆ្លងកាត់ច្រកសមុទ្រតៃវ៉ាន់ដ៏រសើបនេះ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៧ខែកុម្ភៈនេះ។

ក្រសួងការពារជាតិតៃវ៉ាន់ បានឲ្យដឹងថា យន្តហោះរបស់ចិនរួមមានយន្តហោះចម្បាំង និងដ្រូនត្រូវបានប្រទះឃើញកាលពីថ្ងៃអាទិត្យកំពុងអនុវត្ត «ការល្បាតត្រៀមប្រយុទ្ធរួមគ្នា» ជាមួយនាវាយោធានៅជុំវិញកោះតៃវ៉ាន់។ លើសពីនេះប្រព័ន្ធផ្សព្វផ្សាយតៃវ៉ាន់ បានរាយការណ៍ថា យោធារបស់ចិនបានប្រើវិទ្យុទាក់ទងនាវាចម្បាំងកាណាដាដែលឆ្លងកាត់ច្រកសមុទ្រតៃវ៉ាន់ ហើយបានព្រមាននាវានេះឱ្យផ្លាស់ប្តូរទិសដៅ។

បើតាមក្រសួងការបរទេសតៃវ៉ាន់ នាវាចម្បាំងប្រភេទ Halifax-class HMCS Ottawa គឺជានាវាកងទ័ពជើងទឹកកាណាដាដំបូងគេដែលបានឆ្លងកាត់ផ្លូវទឹកនៅឆ្នាំនេះ។ ការឆ្លងកាត់របស់នាវានេះក៏បានកើតឡើងប៉ុន្មានថ្ងៃបន្ទាប់ពីនាវារបស់សហរដ្ឋអាមេរិកចំនួនពីរ ដែលជានាវាពិឃាតកងទ័ពជើងទឹក និងនាវាអង្កេតមហាសមុទ្រ បានធ្វើការឆ្លងកាត់។

ចាប់តាំងពីថ្ងៃចន្ទសប្ដាហ៍មុន ពេលដែលនាវាពិឃាត និងនាវាអង្កេតមហាសមុទ្ររបស់អាមេរិកបានធ្វើដំណើរឆ្លងកាត់ច្រកសមុទ្របានធ្វើឲ្យយោធាចិនរិះគន់ថា អាមេរិកបានបញ្ជូន «សញ្ញាខុស និងបង្កើនហានិភ័យសន្តិសុខ»។

នៅពេលនោះទិន្នន័យដែលបានចេញផ្សាយដោយក្រសួងការពារជាតិតៃវ៉ាន់ បានបង្ហាញថា យន្តហោះយោធាចិនចំនួន ៦២​ត្រូវ​បានប្រទះឃើញនៅជិតកោះនេះក្នុងរយៈពេល៤៨ម៉ោង ស្របពេលជាមួយនឹងការដឹកជញ្ជូនរបស់នាវាអាមេរិក។

សហរដ្ឋអាមេរិក និងសម្ព័ន្ធមិត្តតែងតែឆ្លងកាត់ច្រកសមុទ្រតៃវ៉ាន់ប្រវែង ១៨០គីឡូម៉ែត្រ ដើម្បីពង្រឹងជាផ្លូវទឹកអន្តរជាតិដែលធ្វើឱ្យចិនខឹងសម្បារ។

ការឆ្លងកាត់ចុងក្រោយរបស់ទីក្រុងវ៉ាស៊ីនតោន ឆ្លងកាត់ច្រកសមុទ្រតៃវ៉ាន់ គឺជាលើកទីមួយ ចាប់តាំងពីប្រធានាធិបតីអាមេរិក លោក ដូណាល់ ត្រាំ ចូលកាន់តំណែងក្នុងខែមករា។ ការឆ្លងកាត់នេះក៏បានកើតឡើងបន្ទាប់ពីប្រធានា​ធិបតី​​អាមេរិក ដូណាល់​ ត្រាំ និងនាយករដ្ឋមន្រ្តីជប៉ុន លោក Shigeru Ishiba ថាពួកគេ «ប្រឆាំងនឹងការប៉ុនប៉ងណាមួយដើម្បី​ផ្លាស់ប្តូរស្ថានភាពបច្ចុប្បន្នជាឯកតោភាគី នៅក្នុងច្រកសមុទ្រតៃវ៉ាន់ ដោយការបង្ខិតបង្ខំ»។

សហរដ្ឋអាមេរិក ក៏ដូចប្រទេសភាគច្រើន​ផ្សេងទៀត​​មិនមានទំនាក់ទំនងការទូតផ្លូវការជាមួយតៃវ៉ាន់ទេ ប៉ុន្តែជាអ្នកគាំទ្រអន្តរជាតិដ៏រឹងមាំបំផុតរបស់តៃ​វ៉ាន់​ និងផ្តល់ជំនួយយោធា ដើម្បីជួយរក្សាសមត្ថភាពការពារដល់កោះនេះ ខណៈទីក្រុងប៉េកាំងថ្កោលទោសជានិច្ចចំពោះការបង្ហាញការគាំទ្រចំពោះទីក្រុងតៃប៉ិពីទីក្រុងវ៉ាស៊ីនតោន៕

អត្ថបទ៖ ប៊ុន សុភាព

The post យន្តហោះយោចិន២៤គ្រឿង​ហោះ​ឆ្វែល​​នៅជិតកោះ​​តៃ​វ៉ាន់​ appeared first on Kampuchea Thmey Daily.