ព្រះនាង Mikasa នៃប្រទេសជប៉ុន សោយទិវង្គតក្នុងព្រះជន្ម ១០១ ព្រះវស្សា

តាមការចុះផ្សាយរបស់ NHK, ព្រះនាង Mikasa នៃប្រទេសជប៉ុន ព្រះនាម Yuriko បានសោយទិវង្គតនៅព្រឹកថ្ងៃសុក្រទី១៥ខែវិច្ឆិកាឆ្នាំ២០២៤ ក្នុងព្រះជន្ម ១០១ ព្រះវស្សា។

ព្រះនាង​បាន​ព្យាបាលព្រះរាជសុខភាព​នៅ​មន្ទីរពេទ្យ St Luke’s International Hospital ក្នុង​ទីក្រុង​តូក្យូ កាល​ពី​ថ្ងៃ​ទី​៣ខែ​មីនា បន្ទាប់​ពី​មាន​ជំងឺ​ដាច់​សរសៃ​ឈាម​ក្នុង​ខួរក្បាល និង​រលាក​សួត។

ដំបូងឡើយ ព្រះនាងទទួលការព្យាបាលនៅក្នុងបន្ទប់ ICU ប៉ុន្តែ១០ថ្ងៃក្រោយក៏ផ្លាស់ទៅបន្ទប់ឯកជនមួយ បន្ទាប់ពីជាសះស្បើយ ហើយអាចធ្វើចលនាបាន រីឯជំងឺរលាកសួតរបស់ព្រះនាងក៏ប្រសើរឡើងដែរ។

ទោះជាយ៉ាងណាក៏ដោយ ព្រះនាងត្រូវបញ្ជូនចូលទៅបន្ទប់ ICU វិញរហូតដល់ដើមខែកញ្ញា ​លុះមកដល់ថ្ងៃសុក្រសប្តាហ៍មុន ព្រះរាជសុខភាពរបស់ព្រះនាង ស្រាប់តែដុនដាបតែម្តង។

សូមបញ្ជាក់ថា ព្រះនាងបានរៀបអភិសេកជាមួយព្រះអង្គម្ចាស់ Mikasa ក្នុងឆ្នាំ១៩៤១ ខណៈព្រះនាង បានឈានចូល​ព្រះជន្ម​១០១​ព្រះវស្សា​នៅ​ថ្ងៃទី​៤ ខែមិថុនា៕

អត្តបទ៖ សុខ សុវណ្ណ

The post ព្រះនាង Mikasa នៃប្រទេសជប៉ុន សោយទិវង្គតក្នុងព្រះជន្ម ១០១ ព្រះវស្សា appeared first on Kampuchea Thmey Daily.