ព្យុះស៊ីក្លូនត្រូពិច Alfred ដ៏មានឥទ្ធិពល នឹងវាយប្រហារ រដ្ឋ Queensland អូស្រ្តាលី
អាជ្ញាធរបានព្រមានអ្នកស្រុកឱ្យស្នាក់នៅក្នុងផ្ទះនិងត្រៀមលក្ខណៈទប់ទល់ ខណៈដែលព្យុះស៊ីក្លូន Alfred ដ៏គួរឱ្យខ្លាចខិតមកជិតដល់រដ្ឋQueensland ប្រទេស... The post ព្យុះស៊ីក្លូនត្រូពិច Alfred ដ៏មានឥទ្ធិពល នឹងវាយប្រហារ រដ្ឋ Queensland អូស្រ្តាលី appeared first on Kampuchea Thmey Daily.
អាជ្ញាធរបានបង្កើនការព្រមានដល់ប្រជាជនក្នុងតំបន់ឱ្យស្នាក់នៅក្នុងផ្ទះនិងត្រៀមលក្ខណៈទប់ទល់ព្យុះកំណាចស៊ីក្លូន Alfred ដ៏គួរឱ្យខ្លាចដែលជិតវាយប្រហាររដ្ឋ Queensland ប្រទេសអូស្រ្តាលី។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី៧ខែមីនានេះ។
មនុស្សបួនលាននាក់ស្ថិតក្នុងជួរផ្លូវដែលព្យុះស៊ីក្លូននេះបក់បោក។ ព្យុះនេះត្រូវបានគេរំពឹងថា នឹងវាយលុកនៅចន្លោះ Sunshine Coast និង Gold Coast ដែលជាតំបន់ជាឆ្នេរដ៏ស្រស់ស្អាតរបស់ប្រទេសអូស្ត្រាលី។ព្យុះនេះអាចមានល្បឿនរហូតដល់ ៩៥គីឡូម៉ែត្រក្នុងមួយម៉ោងជាមួយនឹងខ្យល់ខ្លាំងរហូតដល់ ១៣០គីឡូម៉ែត្រក្នុងមួយម៉ោង។
ព្យុះស៊ីក្លូននេះត្រូវបានគេរំពឹងថានឹងបោកបក់ជាប្រព័ន្ធប្រភេទទី ២នៅព្រឹកថ្ងៃសៅរ៍។ ផ្លូវរបស់វាបានថយចុះក្នុងរយៈពេលប៉ុន្មានថ្ងៃថ្មីៗនេះ ហើយបាននិងកំពុងផ្លាស់ប្តូរ «ខុសប្រក្រតី» យោងទៅតាមអ្នកជំនាញអាកាសធាតុ ដែលជាមូលហេតុដែលវាបកមកដល់ដីត្រូវបានពន្យារពេលពីការព្យាករណ៍ពីមុន។
ក្រៅពីខ្យល់បក់ខ្លាំង ព្យុះស៊ីក្លូន Alfred ត្រូវបានគេរំពឹងថានឹងធ្វើឱ្យមានភ្លៀងធ្លាក់មានកម្ពស់រហូតដល់៨០០មីលីម៉ែត្រក្នុងរយៈពេលប៉ុន្មានថ្ងៃខាងមុខនេះ ដែលប៉ះពាល់ដល់តំបន់ដ៏ធំមួយនៃភាគខាងត្បូងរដ្ឋ Queensland និងភាគខាងជើងនៃរដ្ឋ New South Wales ខណៈការជន់លិចតាមដងទន្លេ គឺជាក្តីកង្វល់ដ៏ធំបំផុតនៅក្នុងតំបន់ទំនាប។
អាជ្ញាធរមានបំណងរៀបចំសហគមន៍មុនព្យុះស៊ីក្លូន Alfred មកដល់ ដោយបានជួយរៀបចំដាក់បាវខ្សាច់នៅទូទាំងតំបន់ដើម្បីជួយអ្នកស្រុកការពារផ្ទះរបស់ប្រជាជន។
នៅថ្ងៃសុក្រនេះ មនុស្សជាង ៨០០០០ នាក់នៅក្នុងរដ្ឋទាំងពីរនេះគ្មានថាពលប្រើប្រាស់ ហើយមនុស្សរាប់ម៉ឺននាក់ទៀតស្ថិតនៅក្រោមការបញ្ជាជម្លៀស។ សាលារៀនជិត ១០០០ ត្រូវបានបិទ ការដឹកជញ្ជូនសាធារណៈត្រូវបានផ្អាក និងព្រលានយន្តហោះត្រូវបានបិទ។ ជើងហោះហើរក៏ត្រូវបានលុបចោលហូតដល់ថ្ងៃអាទិត្យផងដែរ។
ទោះយ៉ាងណាព្យុះស៊ីក្លូននៅរដ្ឋ Queensland មិនមែនជារឿងចម្លែកនោះទេ ព្រោះវាជារដ្ឋដែលងាយរងគ្រោះដោយគ្រោះមហន្តរាយបំផុតនៅក្នុងប្រទេសអូស្ត្រាលី ជាពិសេសគ្រោះទឹកជំនន់គឺមានច្រើនជាងគេ។ កាលពីខែកុម្ភៈ ឆ្នាំ ២០២២ ផ្ទះរាប់ពាន់ខ្នងត្រូវបានខូចខាតនៅតាមបណ្តោយភាគខាងកើតនៃប្រទេសអូស្ត្រាលី បន្ទាប់ពីភ្លៀងធ្លាក់ខ្លាំង៕
អត្ថបទ៖ ប៊ុន សុភាព
The post ព្យុះស៊ីក្លូនត្រូពិច Alfred ដ៏មានឥទ្ធិពល នឹងវាយប្រហារ រដ្ឋ Queensland អូស្រ្តាលី appeared first on Kampuchea Thmey Daily.
