Instagram បិទមិនឲ្យក្មេងក្រោម១៦ឆ្នាំ livestream បានទៀតទេ
ម្ចាស់កម្មវិធី Meta Platforms បាននិយាយកាលពីថ្ងៃអង្គារថា អ្នកប្រើប្រាស់ Instagram ដែលមានអាយុក្រោម ១៦ឆ្នាំនឹងមិនអាច livestream ដោយគ្មានការយល់... The post Instagram បិទមិនឲ្យក្មេងក្រោម១៦ឆ្នាំ livestream បានទៀតទេ appeared first on Kampuchea Thmey Daily.
អ្នកប្រើប្រាស់បណ្ដាញសង្គម Instagram ដែលមានអាយុក្រោម១៦ឆ្នាំ នឹងមិនអាចធ្វើការ livestream ដោយគ្មានការយល់ព្រមពីឪពុកម្ដាយបានទៀតទេ។ នេះបើយោងតាមសេចក្ដីប្រកាសកាលពីថ្ងៃអង្គារទី៨ខែមេសារបស់ក្រុមហ៊ុន Meta ដែលជាក្រុមហ៊ុនមេរបស់ Instagram ដើម្បីពង្រឹងវិធានការសុវត្ថិភាពរបស់ខ្លួនសម្រាប់ការពារក្មេងវ័យជំទង់។
នៅក្រោមការផ្លាស់ប្តូរនេះ ក្មេងជំទង់ដែលមានអាយុក្រោម១៦ឆ្នាំត្រូវបានរារាំងមិនឱ្យប្រើប្រាស់ Instagram Live លុះត្រាតែឪពុកម្តាយផ្តល់ការអនុញ្ញាត។ លើសពីនេះ ក្រុមហ៊ុន Meta ក៏បានឲ្យដឹងផងដែរថា ការផ្ញើរសារដែលមានរូបភាពដែលសង្ស័យថាជារូបមិនសមរម្យឬអាក្រាតកាយនឹងត្រូវបានបិទបាំង។ Meta ក៏កំពុងពង្រឹងការការពារគណនីក្មេងជំទង់ស្រដៀងគ្នានេះទៅលើ Facebook និង Messenger ផងដែរដើម្បីកំណត់មាតិកាមិនសមរម្យ។
វិធានការថ្មីនេះ នឹងបន្ថែមពីលើការការពារដែលមានស្រាប់ចំពោះអ្នកប្រើប្រាស់ Instagram វ័យក្មេង ដូចជា ការដាក់គណនីក្មេងជំទង់ទៅជាឯកជន ការទប់ស្កាត់សារឯកជនពីមនុស្សចម្លែក ការដាក់កម្រិតយ៉ាងតឹងរ៉ឹងលើខ្លឹមសាររសើបដូចជា វីដេអូវាយគ្នា ការរំលឹកឱ្យចេញពីកម្មវិធីបន្ទាប់ពីប្រើបាន៦០នាទី និងការជូនដំណឹងឲ្យផ្អាកការប្រើក្នុងអំឡុងពេលចូលគេង។
គួរបញ្ជាក់ថា Meta បានបញ្ចេញកម្មវិធីគណនីក្មេងជំទង់ក្នុង Instagram ក្នុងខែកញ្ញាឆ្នាំមុន ដើម្បីផ្តល់ឱ្យឪពុកម្តាយនូវជម្រើសបន្ថែមទៀតក្នុងការគ្រប់គ្រងសកម្មភាពលើអ៊ីនធឺណិតរបស់កូនៗពួកគេ ចំពេលមានប្រតិកម្មកាន់តែខ្លាំងឡើងប្រឆាំងនឹងរបៀបដែលប្រព័ន្ធផ្សព្វផ្សាយសង្គមប៉ះពាល់ដល់ជីវិតរបស់មនុស្សវ័យក្មេង។ ក្រុមហ៊ុនបាននិយាយថាយ៉ាងហោចណាស់មានគណនីក្មេងជំទង់ចំនួន ៥៤លានត្រូវបានបង្កើតឡើងចាប់តាំងពីកម្មវិធីនេះដំណើរការ។
កំណែទម្រង់ចុងក្រោយបំផុតនេះនឹងចាប់ផ្តើមដំបូងសម្រាប់អ្នកប្រើប្រាស់នៅសហរដ្ឋអាមេរិក ចក្រភពអង់គ្លេស កាណាដា និងអូស្ត្រាលី និងពង្រីកទៅកាន់អ្នកប្រើប្រាស់ទូទាំងពិភពលោកក្នុងប៉ុន្មានខែបន្ទាប់៕
អត្ថបទ៖ ប៊ុន សុភាព
The post Instagram បិទមិនឲ្យក្មេងក្រោម១៦ឆ្នាំ livestream បានទៀតទេ appeared first on Kampuchea Thmey Daily.
