១ខែ បន្ទាប់ពីការរញ្ជួយដីកម្រិត ៧.៧ រ៉ិចទ័រ មីយ៉ាន់ម៉ា​រងការរញ្ជួយដីកម្រិតស្រាល​ ១៥៧ លើក

យោងតាមការចេញផ្សាយរបស់ China Daily នៅថ្ងៃទី២៨ខែមេសានេះ ប្រទេសមីយ៉ាន់ម៉ាបានជួបប្រទះការរញ្ជួយដីសរុបចំនួន ១៥៧ លើកបន្ទាប់ពីគ្រោះរញ្ជួយដីដ៏ធ្ងន់ធ្ងរកម្រិត ៧.៧ រ៉ិចទ័រ កាលពីថ្ងៃទី ២៨ ខែមីនា។

នាយកដ្ឋានឧតុនិយម និងជលសាស្ត្ររបស់ប្រទេសមីយ៉ាន់ម៉ា បានរាយការណ៍នៅពីថ្ងៃចន្ទនេះថា ប្រទេសមីយ៉ាន់ម៉ាបាន​​ជួបប្រទះការរញ្ជួយដីសរុបចំនួន ១៥៧ លើក ចាប់ពី ២.៨ ដល់ ៧.៥ រ៉ិចទ័រ។ ទោះបីរញ្ជួយដីក្រោយៗនេះមិនធ្ងន់ធ្ងរដូចលើកមុន ប៉ុន្តែវាបានធ្វើឲ្យប្រជាជនជាច្រើនមិនហ៊ានស្នាក់នៅក្នុងផ្ទះ និងបង្កភាពភ័យខ្លាចក្នុងចំណោមប្រជាជនដែលស្ថិតក្នុងតំបន់ដែលធ្លាប់រងគ្រោះដោយសាររញ្ជួយដីរួចហើយ។

គួរបញ្ជាក់ថា រញ្ជួយដ៏ធ្ងន់ធ្ងរនៅក្នុងសារព័ត៌មាន Myanma Alinn បានរាយការណ៍ថា គិតត្រឹមថ្ងៃទី ២៥ ខែមេសា ចំនួនអ្នកស្លាប់ដោយសារគ្រោះរញ្ជួយដីបានកើនឡើងដល់ ៣​៧៦៣នាក់ ខណៈមនុស្សចំនួន ៥១០៧ នាក់បានរងរបួស និង១១០ នាក់បាត់ខ្លួន។ ចំនួនអ្នកស្លាប់ និងរបួសនៅក្នុងប្រទេសមីយ៉ាន់ម៉ា ប្រែប្រួលតាមប្រភពផ្សេងៗគ្នា បើតាម Mizzima News អ្នកស្លាប់ចំនួន ៥,៣៥២នាក់ របួស ៧១០៨ នាក់ និងមនុស្សបាត់ខ្លួនចំនួន ៥៣៨នាក់ ។ អ្នកស្លាប់ភាគច្រើននៅក្នុងតំបន់ Mandalay, Naypyidaw, Sagaing, Shan, Bago, Magway និង Kayin។

យោងតាមរអង្គការសហប្រជាជាតិទទួលបន្ទុកជនភៀសខ្លួនបានប៉ាន់ប្រមាណថាជនជាតិមីយ៉ាន់ម៉ាជាង ១៧ លាននាក់ត្រូវបានរងផលប៉ះពាល់នៅទូទាំង៥៧ នៃសង្កាត់ចំនួន៣៣០ ក្នុងប្រទេស។ គិតត្រឹមថ្ងៃទី១០ ខែមេសា ក្រុមអ្នក​ជួយ​សង្គ្រោះ​បាននិយាយថា សាកសពរាប់សិបនាក់ ទំនងជានៅតែជាប់នៅក្រោមសំណង់បាក់រលំ ខណៈមនុសុ្សរាប់ពាន់នាក់ស្នាក់នៅក្នុងតង់បណ្ដោះអាសន្ន ដែលបង្កើនការព្រួយបារម្ភអំពីជំងឺអាសន្នរោគ និងជំងឺគ្រុនឈាម៕

អត្ថបទ៖ ប៊ុន សុភាព

The post ១ខែ បន្ទាប់ពីការរញ្ជួយដីកម្រិត ៧.៧ រ៉ិចទ័រ មីយ៉ាន់ម៉ា​រងការរញ្ជួយដីកម្រិតស្រាល​ ១៥៧ លើក appeared first on Kampuchea Thmey Daily.