រថយន្តដឹកទំនិញបុករះរថយន្ដ និងម៉ូតូច្រើនគ្រឿង​ពេលកំពុងឈប់ចាំភ្លើងស្តុប

រថយន្តដឹកទំនិញមួយគ្រឿងបើកបរក្នុងល្បឿនលឿន ខណៈមកដល់ចំណុចភ្លើងស្តុបចាប់ហ្វ្រាំងមិនទាន់ជ្រុលបុករះម៉ូតូ២គ្រឿង និងរថយន្ដ១គ្រឿង បណ្ដាលឲ្យនារីម្នាក់រងរបួសធ្ងន់ ត្រូវបានបញ្ជូនទៅកាន់មន្ទីរពេទ្យ។

ហេតុការណ៍នេះបង្កមានការភ្ញាក់ផ្អើលកាលពីវេលាម៉ោង៨ព្រឹកថ្ងៃទី១៩ ខែធ្នូ ឆ្នាំ២០២៤ ស្ថិតតាមបណ្ដោយផ្លូវហាណូយ ត្រង់ចំណុចភ្លើងស្ដុប ក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។

បើតាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុ គេឃើញមានរថយន្ដដឹកទំនិញមួយគ្រឿងក្បាលពណ៌ខៀវលាយស ពាក់ស្លាកលេខ 3C-1976 បើកបរដោយបុរសម្នាក់ធ្វើដំណើរតាមបណ្ដោយផ្លូវហាណូយទិសដៅពីជើងមកត្បូងក្នុងល្បឿនលឿន ខណៈពេលដល់ចំណុចភ្លើងស្ដុបចាប់ហ្វ្រាំងមិនជាប់ក៏ជ្រុលបុករះម៉ូតូពីរគ្រឿងរុញផ្ទុបជាមួយរថយន្តមួយគ្រឿងទៀតម៉ាក Luxes HS250H បណ្ដាលឲ្យរងការខូចខាត។ ក្នុងនោះបណ្ដាលឲ្យនារីម្នាក់ដែលជិះម៉ូតូ ត្រូវរថយន្ដកិនពីលើរងរបួសធ្ងន់ និងត្រូវបានរថយន្ដសង្គ្រោះបន្ទាន់ដឹកទៅមន្ទីពេទ្យ។ចំណែកកៃកុងរថយន្ដបង្កត្រូវបានសមត្ថកិច្ចឃាត់ខ្លួនយកទៅប៉ុស្ដិ៍នគរបាលដើម្បីសួរនាំ។

ក្រោយពេលកើតហេតុសមត្ថកិច្ចមូលដ្ឋានក៏បានទាក់ទងកម្លាំងសមត្ថកិច្ចជំនាញចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញដើម្បីធ្វើការវាស់វែង យករថយន្ដបង្ក និងម៉ូតូជនរងគ្រោះទាំង២គ្រឿងទៅរក្សាទុករង់ចាំដោះស្រាយគ្នានៅពេលក្រោយ៕

អត្ថបទ៖ ម៉េង

The post រថយន្តដឹកទំនិញបុករះរថយន្ដ និងម៉ូតូច្រើនគ្រឿង​ពេលកំពុងឈប់ចាំភ្លើងស្តុប appeared first on Kampuchea Thmey Daily.