រដ្ឋបាលខេត្តត្បូងឃ្មុំ ស្វាគមន៍ពលរដ្ឋខ្មែរក្រៅប្រទេស ដែលមកទស្សនាព្រំដែន កម្ពុជា-វៀតណាម

ត្បូងឃ្មុំ ៖ នាព្រឹកថ្ងៃ១៨ ខែមីនា ឆ្នាំ ២០២៥ លោក ម៉ៅ ឌុង អភិបាលរងខេត្ត តំណាងដ៏ខ្ពង់ខ្ពស់ លោក ប៉ែន កុសល្យ អភិបាល នៃគណអភិបាលខេត្តត្បូងឃ្មុំ បានអញ្ជើញទទួលស្វាគមន៍ បងប្អូនសហគមន៍ខ្មែរមកពីប្រទេសអូស្ត្រាលី និងណូវែលហ្សេឡង់ ទស្សនកិច្ច មកកាន់តំបន់ព្រំដែន បង្គោល លេខ ១២៥ និង១៣០ កម្ពុជា-វៀតណាម ក្នុងភូមិសាស្រ្តស្រុកពញាក្រែក ខេត្តត្បូងឃ្មុំ ។

ដំណើរទស្សនកិច្ចនេះ គឺបានពិនិត្យមើលឃើញដោយផ្ទាល់ អំពីស្ថានភាពភូមិសាស្ត្រពិតជាក់ស្តែង ក្នុងមូលដ្ឋាន ជាពិសេសគឺទីតាំងបង្គោលព្រំដែនរវាងកម្ពុជា-វៀតណាម នៅក្នុងតំបន់ភូមិសាស្ត្រតាមខ្សែបន្ទាត់ព្រំដែន ជាមួយការបង្ហាញពន្យល់ ពីសំណាក់ លោក ម៉ៅ ឌុង អភិបាលរងខេត្តត្បូងឃ្មុំ នៃដំណើរការ កំណត់ព្រំដែន ការគ្រប់គ្រង និងការការពារបូរណភាពទឹកដីជាតិ ។

ក្នុងនោះដែរ មន្ត្រីជំនាញ បានអត្ថាធិប្បាយលម្អិត ពាក់ព័ន្ធនឹងការងារព្រំដែន ការងារបោះបង្គោល ខណ្ឌសីមាព្រំដែនគោក និងការថែរក្សាការពារអធិបតេយ្យភាពជាតិ បូរណភាពទឹកដីកម្ពុជាផងដែរ។ តាមរយៈបទបង្ហាញនេះ បងប្អូនខ្មែរមកពីប្រទេសអូស្ត្រាលី និងណូវែលហ្សេឡង់ បានឃើញនូវ ភាពត្រឹមត្រូវ និងភាពរឹងមាំ នៃខ្សែបន្ទាត់ព្រំដែន ដែលបានកំណត់យ៉ាងច្បាស់លាស់ ។

ការមកឃើញដោយផ្ទាល់ និងការស្ដាប់ព័ត៌មាន ពីសមត្ថកិច្ចជំនាញ និងរដ្ឋបាលខេត្ត បានផ្តល់ទំនុកចិត្តខ្លាំង ដល់បងប្អូនខ្មែរ រស់នៅក្រៅប្រទេស អំពីស្ថានភាពពិតនៃសង្គម-សេដ្ឋកិច្ច និងហេដ្ឋារចនាសម្ព័ន្ធក្នុងមូលដ្ឋាន ដែលមានការអភិវឌ្ឍជាក់ស្តែងយ៉ាងច្រើន និងជាបន្តបន្ទាប់។ ជាងនេះទៀត សកម្មភាពនៃដំណើរទស្សនកិច្ចនេះ បងប្អូនខ្មែរ ដែលបានចូលរួម ទទួលបានការផ្សព្វផ្សាយយ៉ាងទូលំទូលាយ ទាំងក្នុង និងក្រៅប្រទេសកម្ពុជា ដែលនេះជាទឡ្ហីករណ៍ ដ៏សំខាន់បានបញ្ជាក់ ពីភាពច្បាស់លាស់ប្រាកដប្រជា និងឆន្ទៈមុះមុតរបស់រាជរដ្ឋាភិបាលកម្ពុជា ក្នុងការបន្តបេសកកម្ម ដើម្បីការពារអធិបតេយ្យភាពជាតិ បូរណភាពទឹកដី និងបន្តធានាសុខសន្តិភាព និងស្ថិរភាពសង្គម-សេដ្ឋកិច្ច សម្រាប់ជាប្រយោជន៍ដល់ជាតិ និងប្រជាជនកម្ពុជាទាំងអស់។ ពួកគាត់ បានលើកឡើងថា “ព្រំដែន របស់កម្ពុជា ពិតជាមានភាពរឹងមាំ ច្បាស់លាស់ និងមិនមានប្រទេសណា អាចឈ្លានពានយកបានសូម្បីតែមួយមីលីមែត្រ” ។

ក្រោយពីបានចុះពិនិត្យ និងបានទទួលព័ត៌មាន ពីស្ថានភាពពិត ក្នុងតំបន់ភូមិសាស្ត្រខាងលើរួច ក្រុមទស្សនកិច្ច បានបន្តដំណើរទៅកាន់ទីតាំងសំខាន់ៗផ្សេងៗទៀត តាមផែនការដែលបានគ្រោងទុក ក្នុងតម្រាយផ្លូវទស្សនកិច្ច ដោយអ្នកចូលរួមទាំងអស់ បានអញ្ជើញទៅពិនិត្យមើល ដោយផ្ទាល់នូវបង្គោលព្រំដែន នៅក្នុងទីតាំងដែលជាទីតាំងបង្គោលមេ ព្រមទាំងទស្សនាទីតាំងបង្គោលសំខាន់ៗផ្សេងៗទៀត ដែលជាទីតាំងបង្គោលបំពេញបន្ថែម និងទីតាំងបង្គោលតម្រុយព្រំដែន ក្នុងភូមិសាស្រ្តស្រុកពញាក្រែក ខេត្តត្បូងឃ្មុំ ផងដែរ ៕

ដោយ ៖ សាន វិឡែម

The post រដ្ឋបាលខេត្តត្បូងឃ្មុំ ស្វាគមន៍ពលរដ្ឋខ្មែរក្រៅប្រទេស ដែលមកទស្សនាព្រំដែន កម្ពុជា-វៀតណាម appeared first on Kampuchea Thmey Daily.