មនុស្ស៣នាក់​បាន​ស្លាប់ និង​២នាក់​ទៀត​កំពុង​ជួយ​សង្គ្រោះ សង្ស័យ​ករណី​ពុលស្រា ​ស

រតនគិរី ៖ ប្រជាពលរដ្ឋនៅភូមិយ៉ាសោម ឃុំស៊ើង ស្រុកបរកែវ ៣នាក់បានស្លាប់ និងកំពុងជួយសង្គ្រោះបន្ទាន់ ២នាក់ទៀត សង្ស័យជាករណីពុលស្រាស។ លោក ញ៉ែម សំអឿន អភិបាលខេត្ត បានបញ្ជាឲ្យអាជ្ញាធរមូលដ្ឋានទាំងអស់បិទទីតាំងផលិតស្រាស នៅទូទាំងខេត្ត ដោយរង់ចាំលទ្ធផល​ធ្វើ​សំណាក​ពី​ក្រុមគ្រូពេទ្យសិន។

នេះបើយោងតាមរបាយការណ៍ ពីក្រុមឆ្លើយតបបន្ទាន់ នៃមន្ទីរសុខាភិបាលខេត្តរតនគិរី ឱ្យដឹងនៅរសៀលថ្ងៃទី២៩ ខែមករា ឆ្នាំ២០២៥នេះ។

របាយការណ៍ដដែលបានបញ្ជាក់​ថា នៅវេលាម៉ោង១២និង០៦នាទី ថ្ងៃដដែល នាយកដ្ឋានប្រយុទ្ធនឹងជំងឺឆ្លង បាន​ទទួល​ព័ត៌មាន ពី​ក្រុម​ឆ្លើយតបបន្ទាន់ នៃ​មន្ទីរ​សុខាភិបាលខេត្តរតនគិរី គឺមានករណីសង្ស័យពុលម្ហូបអាហារមួយ ដោយមានករណី សរុបចំនួន ៥នាក់ ក្នុងនោះមាន ៣នាក់បានស្លាប់ និង២នាក់ផ្សេងទៀត កំពុងសម្រាកព្យាបាលនៅមន្ទីរពេទ្យ។

អ្នកស្លាប់ទាំង៣នាក់នោះ ទី១-ភេទប្រុស អាយុ៧៨ឆ្នាំ ទី២-ភេទប្រុស អាយុ៦០ឆ្នាំ និងទី៣-ភេទស្រី អាយុ៥៤ឆ្នាំ។

ដោយឡែកអ្នកជំងឺដែលកំពុងសម្រាកពេទ្យនោះ ម្នាក់កំពុងសម្រាកនៅមន្ទីរពេទ្យបង្អែកខេត្ត និង១នាក់ទៀត កំពុងសម្រាកនៅព្យាបាលនៅមន្ទីរពេទ្យបង្អែកបរកែវ។ អ្នកជំងឺមានរោគសញ្ញាដូចជា ឈឺពោះ ក្អួត ថប់ដង្ហើម និងស្រវាំងភ្នែកជាដើម។

តាមការអង្កេតរកមូលហេតុរបស់ក្រុមឆ្លើយតបបន្ទាន់ នៃមន្ទីរសុខាភិបាលខេត្តរតនគិរី និងអាជ្ញាធរមូលដ្ឋាន បានធ្វើការសន្និដ្ឋានដោយដាក់ការសង្ស័យថា ការឈឺរបស់អ្នកជំងឺ អាចបណ្ដាលមកពីការពុលម្ហូបអាហារ(ស្រា.ស)។

បច្ចុប្បន្ន ក្រុមការងារខេត្តបានប្រមូលសំណាកម្ហូបអាហារ (ស្រា.ស) និងលាមកអ្នកជំងឺ បញ្ជូនមកមន្ទីរពិសោធន៍ដើម្បីត្រួតពិនិត្យ។ ជាមួយគ្នានេះផងដែរ ក្រុមការងារបានផ្តល់សារអប់រំដល់អ្នកជំងឺ និងអ្នកកំដរអំពីសុវត្ថិភាពម្ហូបអាហារ និងបន្តតាមដាន អ្នកដែលបានបរិភោគហើយ តែមិនទាន់ចេញរោគសញ្ញា។

ភ្លាមៗ បន្ទាប់ពីទទួលបានព័ត៌មាននេះ លោក ញ៉ែម សំអឿន អភិបាលខេត្តរតនគិរី បានបញ្ជាឲ្យអាជ្ញាធរក្រុង, ស្រុក ទាំង៩ ចុះធ្វើការបិទទីតាំងផលិតស្រា.ស ជាបណ្តោះអាសន្ន រង់ចាំលទ្ធផល ធ្វើសំណាកពីក្រុមគ្រូពេទ្យ ថា តើមូលហេតុអ្វីឲ្យពិតប្រាកដបណ្តាលឱ្យមានអ្នកស្លាប់ និងអ្នករងគ្រោះក្នុងករណីនេះ៕

ដោយ ៖ វុទ្ធឦសាន

The post មនុស្ស៣នាក់​បាន​ស្លាប់ និង​២នាក់​ទៀត​កំពុង​ជួយ​សង្គ្រោះ សង្ស័យ​ករណី​ពុលស្រា ​ស appeared first on Kampuchea Thmey Daily.