បែកធ្លាយសារសំឡេងចៅសង្កាត់ចោមចៅទី២ ចចារលុយកាក់ជាមួយអ្នកពាក់ព័ន្ធគ្រឿងញៀន

បែកធ្លាយវីឌីអូរជាសារសម្លេងឆ្លងឆ្លើយគ្នាតាមទូរស័ព្ទរវាងលោក វ៉ា សាវ៉ង ចៅសង្កាត់ចោមចៅទី២ នៃរដ្ឋបាលខណ្ឌពោធិ៍សែនជ័យ ជាមួយអ្នកពាក់ព័ន្ធគ្រឿងញៀន ដោយចចាររឿងលុយកាក់ជាមួយគ្នា។

សារសំឡេងងនេះ ត្រូវបានគេទម្លាយ និងចែកចាយជាបន្តបន្ទាប់តាមបណ្តាញទំនាក់ទំនងសង្គមនានាជាច្រើន ដោយជាការឆ្លើយឆ្លងគ្នាតាមទូរស័ព្ទដៃរវាងស្ត្រីមិនស្គាល់អត្តសញ្ញាណម្នាក់ និយាយរឿងសុំបង់ប្រាក់ចំនួន១លានរៀលពាក់ព័ន្ធនឹងបទល្មើសគ្រឿងញៀន។

ជុំវិញករណីនេះ លោកវរសេនីយ៍ឯក ម៉ន វុទ្ធី អធិការនគរបាលខណ្ឌពោធិ៍សែនជ័យ បញ្ជាក់ថា មកទល់ពេលនេះ មិនទាន់មានគោលការណ៍ណាមួយឱ្យមានការឃាត់ខ្លួនលោក វ៉ា សាវ៉ង ចៅសង្កាត់ចោមចៅទី២នៅឡើយនោះទេ ព្រោះមិនទាន់រកឃើញបទល្មើស ដោយលោកបង្វែររឿងនេះឱ្យទៅសួរនាំខាងរដ្ឋបាលខណ្ឌវិញ ព្រោះសាលាខណ្ឌបានហៅបុគ្គលរូបនោះទៅសាកសួរនាំ ជាជំហានបឋមរួចហើយ។

ដោយឡែកលោក សក់ ច័ន្ទកញ្ញារិទ្ធិ អភិបាលខណ្ឌពោធិ៍សែនជ័យ បានប្រាប់ឱ្យដឹងដែរថា លោកបានទទួលបានព័ត៌មាននេះហើយ និងកំពុងតែបើកការស៊ើបអង្កេតនៅឡើយ ដោយលោកមិនទាន់អាចបញ្ជាក់បានពីដំណើររឿងលម្អិតនៅឡើយទេ ។

ចំពោះសាមីខ្លួនជាចៅសង្កាត់វិញ តាមរយះការបញ្ជាក់នានៅថ្ងៃទី២៦ ខែវិច្ឆិកា ឆ្នាំ២០២៤នេះ លោកបានប្រាប់ថា លោកបានដោះស្រាយបញ្ហានេះចប់ហើយ គ្រប់យ៉ាងគ្រាន់ជាការភ័ន្តច្រលំ និងគ្រាន់ជាការនិយាយលេងសើចប៉ុណ្ណោះ តែមិននឹកស្មានថា ភាគីម្ខាងទៀត ប្រកាន់យកមែនទែនសោះ ។

គួររំលឹកថាកាលពីពេលកន្លងទៅ លោកវ៉ា សាវ៉ង ចៅសង្កាត់ចោមចៅទី២រូបនេះ ក៏ធ្លាប់មានរឿងអាស្រូវ បង្កហិង្សាលើប្រជាពលរដ្ឋផងដែរ ។ លុះក្រោយមករឿងរ៉ាវនោះក៏បានស្ងាត់ ហើយក៏ទើបនឹងលិចចេញរឿងអាស្រូវថ្មីខាងលើនេះតែម្តងទៅ ៕

អត្ថបទ៖ សុភា

The post បែកធ្លាយសារសំឡេងចៅសង្កាត់ចោមចៅទី២ ចចារលុយកាក់ជាមួយអ្នកពាក់ព័ន្ធគ្រឿងញៀន appeared first on Kampuchea Thmey Daily.