ត្រាំ បញ្ជូនទ័ព ១ ៥០០នាក់ ទៅព្រំដែនម៉ិកស៊ិក ដើម្បីបង្ក្រាបជនអន្តោប្រវេសន៍

ក្រោយប្រកាសអាសន្ននៅព្រំដែនជាប់ប្រទេសម៉ិកស៊ិក ពេលនេះប្រធានាធិបតីអាមេរិក លោក ដូណាល់ ត្រាំ បានចេញបញ្ជាឲ្យដាក់ពង្រាយកងទ័ពបន្ថែមទៅព្រំដែនភាគខាងត្បូងនោះហើយ ដើម្បីបង្ក្រាបនិងទប់ស្កាត់លំហូរជនអន្តោប្រវេសន៍ខុសច្បាប់ ដែលកំពុងកើនឡើងយ៉ាងគំហុក។

តាមការចុះផ្សាយរបស់ BBC នៅថ្ងៃព្រហស្បតិ៍ទី២៣ខែមករាឆ្នាំ២០២៥, លោក ត្រាំ បានបញ្ជូនទ័ព ១ ៥០០នាក់ ដោយមានជំនួយពីយន្តហោះ C-17 ២គ្រឿងនិង C-130 ២គ្រឿង ព្រមទាំងឧទ្ធម្ភាគចក្រច្រើនគ្រឿងទៀតផងដែរ។

ព័ត៌មាននេះក៏ត្រូវបានបញ្ជាក់ដោយអ្នកនាំពាក្យសេតវិមានផងដែរ ដោយលោកស្រី Karoline Leavitt អះអាងថា កងទ័ពត្រូវបានបញ្ជូនទៅកាន់រដ្ឋ តិចសាស់ ហើយ និងព្រមានថា អ្នកណាដែលមានះឆ្លងដែនដោយខុសច្បាប់ នឹងជួបប្រទះផលវិបាក។

តាមពិតទៅ អាមេរិកមានទ័ព​សកម្ម​ប្រហែល ២ ២០០នាក់ ​កំពុង​ឈរជើង​នៅ​ព្រំដែន​រួចទៅហើយ ជា​ផ្នែក​នៃក្រុម​ប្រតិបត្តិការរួម Joint Task Force-North ដែល​មាន​ទីស្នាក់ការ​កណ្តាល​នៅ​ទីក្រុង El Paso នៃរដ្ឋ Texas។ ពួកគេកំពុងប្រតិបត្តិការរួមគ្នាជាមួយកងឆ្មាំជាតិ និងភ្នាក់ងារគយនិងការពារព្រំដែនអាមេរិក (CBP)។

លោក ត្រាំ តែងប្តេជ្ញាការពារប្រទេសពីការឈ្លានពានដោយជនចំណាកស្រុកខុសច្បាប់ ហើយនៅក្នុងបទបញ្ជាប្រតិបត្តិដែលចុះហត្ថលេខាភ្លាមៗបន្ទាប់ពីស្បថចូលកាន់តំណែង លោកនិយាយថា ជនចំណាកស្រុកខុសច្បាប់ បានបង្កការគំរាមកំហែងយ៉ាងធំចំពោះសន្តិសុខជាតិនិងសុវត្ថិភាពសាធារណៈ ហើយកំពុងប្រព្រឹត្តអំពើអាក្រក់និងឃោរឃៅប្រឆាំងជនជាតិអាមេរិកស្លូតត្រង់។

សូមបញ្ជាក់ថា កាលពីអណត្តិរបស់លោក ចូ បៃដិន, សហរដ្ឋអាមេរិក ​មាន​លំហូរ​ជន​ចំណាកស្រុកយ៉ាងច្រើនគួរឲ្យកត់សម្គាល់ ដោយបើយោងតាមនាយកដ្ឋានសន្តិសុខមាតុភូមិ បានឲ្យដឹងថា ក្នុងឆ្នាំ២០២៣ ជនអន្តោប្រវេសន៍ ២.៨ លាននាក់បានឆ្លងដែនចូលអាមេរិក៕

អត្ថបទ៖ សុវណ្ណ

ចុចអាន៖ ត្រាំ បញ្ជាឲ្យសមត្ថកិច្ចអាមេរិក ចាប់ខ្លួនជនអន្តោប្រវេសន៍ខុសច្បាប់ នៅតាមសាលារៀន និងព្រះវិហារ

The post ត្រាំ បញ្ជូនទ័ព ១ ៥០០នាក់ ទៅព្រំដែនម៉ិកស៊ិក ដើម្បីបង្ក្រាបជនអន្តោប្រវេសន៍ appeared first on Kampuchea Thmey Daily.