សោកស្តាយ ចាន់ វឌ្ឍនាកា របួសដាច់សរសៃ ACL ជាថ្មី
ចាន់ វឌ្ឍនាកា ដាច់សរសៃ ACL ដែលរបួសបានកើតមានឡើងក្នុងការប្រកួតរបស់ក្លិបជាមួយក្រុមខេត្តកំពង់ចាម The post សោកស្តាយ ចាន់ វឌ្ឍនាកា របួសដាច់សរសៃ ACL ជាថ្មី appeared first on Kampuchea Thmey Daily.
ក្លិបបាល់ទាត់បឹងកេតបានប្រកាសពីកីឡាករ ចាន់ វឌ្ឍនាកា ដាច់សរសៃ ACL ដែលរបួសបានកើតមានឡើងក្នុងការប្រកួតរបស់ក្លិបជាមួយក្រុមខេត្តកំពង់ចាម កាលពីថ្ងៃទី១៥ ខែមករា ឆ្នាំ២០២៥ ជើងទី១ វគ្គ១៦ក្រុមចុងក្រោយ ពានរង្វាន់សម្តេចតេជោ ហ៊ុន សែន ថ្នាក់ជាតិ រដូវកាល២០២៤-២៥។
ក្លិបបានប្រកាសព័ត៌មានជាផ្លូវការនៅរសៀលថ្ងៃទី១៦ ខែមករា ឆ្នាំ២០២៥ថា ៖«ក្លិបកីឡាបាល់ទាត់បឹងកេតពិតជាសោកស្ដាយ បន្ទាប់ពីទទួលបានលទ្ធផលស្គែន MRI ជង្គង់ខាងឆ្វេងរបស់កីឡាករ ចាន់ វឌ្ឍនាកា នៅថ្ងៃនេះ ដែលបង្ហាញថា ACL ជង្គង់ឆ្វេងរបស់ វឌ្ឍនាកា បានដាច់ ហើយទ្រនាប់ឆ្អឹងខ្ចីជង្គង់របស់គេបានបែក បន្ទាប់ពីបានរងរបួសអំឡុងការប្រកួតទល់នឹង ក្រុមខេត្តកំពង់ចាម ម្សិលមិញ ក្នុងពានរង្វាន់សម្ដេចអគ្គមហាសេនាបតីតេជោហ៊ុនសែន២០២៤-២៥។ ក្លិបសូមជូនពរ វឌ្ឍនាកា ឆាប់បានជាសះស្បើយ»។
ចាន់ វឌ្ឍនាកា បានវិលត្រឡប់មកកាន់ទីលានវិញកាលពីខែមីនា ឆ្នាំ២០២៣ បន្ទាប់ពីបានរបូស ACL ជង្គង់ខាងស្តាំក្នុងការប្រកួតជាមួយវិសាខា ក្នុងពានរង្វាន់ Prince Beer Pre-season Cup ថ្ងៃទី ២៦ ខែមករា ឆ្នាំ ២០២២ នៅកីឡដ្ឋានព្រីនស៍។
រូបគេបានសម្រាកព្យាបាលរយៈពេលជាង១ឆ្នាំទើបបានចូលប្រកួតវិញនាមជាកីឡាករផ្លាស់ប្ដូរចូល នៅនាទី៦២ ពេលបឹងកេត ប្រកួត ក្រសួងការពារជាតិ នៅថ្ងៃទី៥ ខែមីនា ឆ្នាំ២០២៣។ ការវិលត្រឡប់មកកាន់ទីលានវិញ រូបគេមិនសូវបានបង្ហាញខ្លួនញឹកញាប់ទេ។ ម្តងម្កាល រូបគេត្រូវបានប្តូរចូលក្នុងវគ្គទី២ រហូតចូលដល់រដូវកាល២០២៤-២៥ ក៏នៅតែមិនអាចបានបង្ហាញខ្លួនញឹកញាប់ ប៉ុន្តែគួរឲ្យស្តាយ ពេលនេះរបួសដាច់ ACL ខាងឆ្វេងវិញម្តង៕
អត្ថបទ៖ វីរបុត្រ
The post សោកស្តាយ ចាន់ វឌ្ឍនាកា របួសដាច់សរសៃ ACL ជាថ្មី appeared first on Kampuchea Thmey Daily.
