ប៉ូលិសថៃ ចាប់ខ្លួន បុរសអូទ្រីស ដែលបើកម៉ូតូទឹកបុកជនជាតិរុស្ស៊ី ស្លាប់

បុរសជនជាតិអូទ្រីសម្នាក់ត្រូវបានចាប់ខ្លួននៅទីក្រុង Krabi បន្ទាប់ពីបើកម៉ូតូទឹក បុកបុរសជនជាតិរុស្ស៊ីម្នាក់ស្លាប់នៅឯឆ្នេរ Karon ក្នុងខេត្ត Phuket ប្រទេសថៃ កាលពីថ្ងៃអង្គារ។ នេះបើយោងតាមការការចេញផ្សាយរបស់សារព័ត៌មាន​Bangkok Post នៅថ្ងៃសុក្រទី២០ខែធ្នូឆ្នាំ២០២៤។

ប៉ូលិស និងមន្ត្រីអន្តោប្រវេសន៍បានចាប់ខ្លួនលោក David Robert Herbst អាយុ ២៥ ឆ្នាំនៅលើកោះ Phi Phi បន្ទាប់ពីមានការស៊ើបអង្កេតលើឧបទ្ទវហេតុដ៏សាហាវនេះ។ ឧបទ្ទវហេតុនេះត្រូវបានរាយការណ៍នៅម៉ោងប្រហែល ៧យប់ថ្ងៃអង្គារដោយអ្នកលក់នៅតូបអាហារនៅក្នុងតំបន់ Karon។ អ្នកទេសចរបរទេសដែលបានឃើញហេតុការណ៍ក៏បានផ្តល់វីដេអូនៃឧបទ្ទវហេតុនិងបានចែករំលែកជាមួយអាជ្ញាធរផងដែរ។

ក្រោយ​ពី​ទទួល​បាន​ដំណឹង​ភ្លាម ប៉ូលិសថៃបាន​ចុះ​ដល់​កន្លែង​កើតហេតុ ដើម្បី​ធ្វើការ​ស្រាវជ្រាវ ។ នៅម៉ោង១២ៈ៤៥ ព្រឹកថ្ងៃពុធ អ្នកនេសាទក្នុងតំបន់បានរកឃើញសាកសពបុរសជនជាតិរុស្សីអាយុ ៥៨ឆ្នាំម្នាក់នៅជិតថ្ម និងរង់ចាំការជូនដំណឹងពីអត្តសញ្ញាណរបស់ជនរងគ្រោះពីក្រុមគ្រួសារ។

គួរបញ្ជាក់ថាជនជាតិរុស្សីរូបនេះបានមកដល់ប្រទេសថៃនៅថ្ងៃទី ១១ ខែធ្នូ ហើយគ្រោងស្នាក់នៅតែម្នាក់ឯងនៅ Lae Lay Suites Karon រហូតដល់ថ្ងៃអាទិត្យ។ យោងតាមការស៊ើបអង្កេតរបស់ប៉ូលិស គេឃើញគាត់ដើរចេញពីកន្លែងសម្រាកទៅឆ្នេរ Karon ដើម្បីហែលទឹកនៅម៉ោងប្រហែល ៥ៈ១៥ ល្ងាចថ្ងៃអង្គារ។

​​ការ​ធ្វើ​កោសល្យ​វិ​ច្ច័​យ​បឋម​​បញ្ជាក់​ថា ជន​រង​គ្រោះ​ពិតជា​ស្លាប់​ដោយសារ​លង់ទឹក​ប្រាកដ​មែន ពុំ​មាន​វត្ថុ​រឹង​ណាមួយ​វាយ​នោះ​ទេ ហើយ​ក៏​ពុំ​ឃើញ​មាន​បាក់​ឆ្អឹង​ដែរ ប៉ុន្តែបន្ទាប់មកប៉ូលិសបានបើកការស៊ើបអង្កេតយ៉ាងយកចិត្តទុកដាក់ដើម្បីកំណត់ពីមូលហេតុពិតប្រាកដនៃការស្លាប់របស់គាត់។

ប៉ូលិស​បាន​ពិនិត្យ​មើលកាមេរ៉ាសុវត្ថិភាពនិង​កំណត់​ទីតាំង​តាមការរៀបរាប់របស់សាក្សី​។ យោងតាមសាក្សី បុរស​ជនជាតិ​រុស្សី​រូប​នេះត្រូវបានបុកដោយម៉ូតូទឹក ខណៈ​វីដេអូ CCTV ក៏បាន​បង្ហាញ​ពី​បុរស​ជិះ​ម៉ូតូទឹកក្នុង​ល្បឿន​លឿន​បុក​គាត់​ផងដែរ។ បន្ទាប់ពីប្រមូលភស្តុតាងគ្រប់គ្រាន់ ប៉ូលិសក៏សុំឲ្យតុលាការ ចេញដីកាចាប់ខ្លួនអ្នកបើកម៉ូតូទឹក។ បុរស​ជនជាតិ​អូទ្រីសដែលត្រូវចាប់ខ្លួននឹង​ត្រូវ​បាន​បញ្ជូន​ទៅ​ប៉ូលិស​ក្រុង Karon ដើម្បី​ចាត់ការ​តាម​ផ្លូវ​ច្បាប់៕

អត្ថបទ៖ ប៊ុន សុភាព

The post ប៉ូលិសថៃ ចាប់ខ្លួន បុរសអូទ្រីស ដែលបើកម៉ូតូទឹកបុកជនជាតិរុស្ស៊ី ស្លាប់ appeared first on Kampuchea Thmey Daily.