បាក់ស្ពាននៅប្រេស៊ីល ធ្លាក់រថយន្តផ្ទុកអាស៊ីដស៊ុលផួរិច លេចធ្លាយសារធាតុគីមីពេញទន្លេ

កាលពីថ្ងៃអាទិត្យទី២២ខែធ្នូឆ្នាំ២០២៤ នៅប្រទេសប្រេស៊ីល មានហេតុការណ៍បាក់ស្ពាន បណ្តាលឲ្យមនុស្ស២នាក់ បាត់បង់ជីវិត ហើយថែមទាំងធ្លាក់រថយន្តផ្ទុកអាស៊ីដស៊ុលផួរិច ចូលទៅក្នុងទន្លេទៀតផង។

ស្ពានដែលបាក់ មានប្រវែង៥៥០ម៉ែត្រ ឆ្លងទន្លេ Tocantins តភ្ជាប់ទីក្រុង Estreito នៃរដ្ឋ Maranhao ទៅកាន់ទីក្រុង Aguiarnopolis នៃរដ្ឋ Tocantins ហើយក្រៅពីមនុស្សស្លាប់ ក៏មានអ្នកបាត់ខ្លួនច្រើននាក់ទៀតដែរ ប៉ុន្តែប្រតិបត្តិការស្វែងរកនិងជួយសង្គ្រោះ ត្រូវរាំងស្ទះដោយសារតែសារធាតុគីមី លេចធ្លាយហូរហៀរពេញទន្លេ។

មកទល់ពេលនេះ ក្រុមមន្ត្រីនៅតែមិនទាន់អាចកំណត់ជាក់លាក់បានថាតើ ស្ពាននេះបាក់បណ្តាលមកពីអ្វី ប៉ុន្តែមានការសន្និដ្ឋានថា មូលហេតុនៃគ្រោះថ្នាក់នេះគឺដោយសារ មានរថយន្តដឹកលើសទម្ងន់ច្រើនគ្រឿង ធ្វើចរាចរណ៍ នាំឲ្យស្ពានមិនអាចទ្រាំទ្របាន។

ក្រោយហេតុការណ៍នេះ អាជ្ញាធរបង្ហាញក្តីបារម្ភយ៉ាងខ្លាំងចំពោះបរិស្ថាន ដែលរងផលប៉ះពាល់ដោយសារការលេចធ្លាយអាស៊ីដស៊ុលផួរិច ខណៈខ្លួនតាមដានស្ថានភាពយ៉ាងយកចិត្តទុកដាក់ និងធានាសុវត្ថិភាពដល់ប្រជាពលរដ្ឋដែលរស់នៅតាមដងទន្លេ។

សូមបញ្ជាក់ថា អាស៊ីដស៊ុលផួរិច ជាសាធាតុគីមីដែលគេយកទៅប្រើ ដើម្បីផលិតគ្រឿងផ្ទុះនិងប្រើក្នុងឧស្សាហកម្មផ្សេងៗទៀត។ វាអាចបង្កផលប៉ះពាល់ដល់ សុខភាពមនុស្ស សត្វ និងជីវចម្រុះយ៉ាងធ្ងន់ធ្ងរ៕

អត្ថបទ៖ សុខ សុវណ្ណ

ចុចអាន៖ ស្លាប់៣នាក់និងរបួស៤នាក់ ក្នុងហេតុការណ៍បាក់ស្ពាននៅរដ្ឋ Mississippi​ សហរដ្ឋអាមេរិក

The post បាក់ស្ពាននៅប្រេស៊ីល ធ្លាក់រថយន្តផ្ទុកអាស៊ីដស៊ុលផួរិច លេចធ្លាយសារធាតុគីមីពេញទន្លេ appeared first on Kampuchea Thmey Daily.