កម្ពុជាជាមុខព្រួយថ្មី ក្រោយក្រុមហ៊ុនអាកាសចរណ៍ធំៗចាប់ជាគោលដៅពង្រីកបណ្តាញហោះហើរបន្ថែម
ក្រុមហ៊ុនអាកាសចរណ៍អន្តរជាតិធំៗជាបន្តបន្ទាប់ បានប្រកាសចាប់ផ្តើមពង្រីក...... The post កម្ពុជាជាមុខព្រួយថ្មី ក្រោយក្រុមហ៊ុនអាកាសចរណ៍ធំៗចាប់ជាគោលដៅពង្រីកបណ្តាញហោះហើរបន្ថែម appeared first on Kampuchea Thmey Daily.
ក្រុមហ៊ុនអាកាសចរណ៍អន្តរជាតិធំៗជាបន្តបន្ទាប់ បានចាប់ផ្តើមពង្រីកជើងហោះហើរបន្ថែមមកប្រទេសកម្ពុជានៅឆ្នាំ ២០២៥។
ក្រុមហ៊ុន Turkish Airlines បានប្រកាសនឹងបើកជើងហោះហើរមកប្រទេសកម្ពុជាពីទីក្រុងអីស្តង់ប៊ុលប្រទេសតួគីនៅចុងឆ្នាំនេះ ខណៈក្រុមហ៊ុនអាកាសចរណ៍ដ៏ធំនៅមជ្ឈិមបូព៌ា Emirates Airlines ក៏នឹងចាប់ផ្តើមពង្រីកជើងហោះហើរមកខេត្តសៀមរាបនៅពាក់កណ្តាលឆ្នាំ ២០២៥។
ការបើកជើងហោះហើរថ្មីៗបន្តបន្ទាប់មកគោលដៅប្រទេសកម្ពុជារបស់ក្រុមហ៊ុមអាកាសចរណ៍ធំៗ ទទួលបានការសាទរពីគ្រប់មជ្ឍដ្ឋានដែលរំពឹងនឹងជួយជំរុញដល់ការអភិវឌ្ឍសេដ្ឋកិច្ចកម្ពុជា។
លោក យឹម សានីរាន មន្ត្រីសម្របសម្រួលនៅអាកាសយានដ្ឋានសៀមរាបអង្គរបានថ្លែងថា ព័ត៌មាននៃការគ្រោងមានការតភ្ជាប់ជើងហោះហើរបន្តបន្ទាប់មកប្រទេសកម្ពុជាពីក្រុមហ៊ុនអាកាសចរណ៍លំដាប់កំពូលៗរបស់ពិភពលោក ជាសញ្ញាណវិជ្ជមាននៃការអភិវឌ្ឍវិស័យអាកាសចរណ៍របស់ប្រទេសកម្ពុជា។
«នៅពេលវិស័យអាកាសចរណ៍មានភាពរីកចម្រើន ជួយដល់ការអភិវឌ្ឍសេដ្ឋកិច្ច និងនាំចំណូលដល់អ្នកធ្វើការពាក់ព័ន្ធគ្រប់ផ្នែកមិនថាអ្នកដឹកជញ្ជូន មគ្គុទ្ទេសក៍ទេសចរណ៍ ម្ចាស់សណ្ឋាគារ រួមទាំងអ្នកផ្តល់សេវាកម្មទេសចរណ៍ផ្សេងទៀត»។ នេះបើតាមលោក យឹម សានីរាន។
ជាមួយគ្នានេះដែរ លោក ស៊ីន ចាន់សិរីវុត្ថា មន្ត្រីអ្នកនាំពាក្យអាកាសចរណ៍ស៊ីវិលក៏មើលឃើញពីផលជះវិជ្ជមាន នៅពេលក្រុមហ៊ុនអាកាសចរណ៍ធំៗ បានពង្រីកជើងហោះហើរមកប្រទេសកម្ពុជាដែលនឹងនាំលំហូរមនុស្ស និងការតភ្ជាប់ពីគ្រប់គោលដៅកាន់តែងាយស្រួល។
លោកថា វិបត្តិសកលនិងស្ថានភាពកូវីដហាក់រលប់បាត់បណ្តើរៗ ដែលនាំឲ្យមានកំណើនចរាចរណ៍តាមផ្លូវអាកាសកាន់តែមមាញឹក។
ស្របពេលដែលប្រទេសកម្ពុជា បានខិតខំស្តារមុខមាត់ពីផលអវិជ្ជមានឡើងវិញ រួមទាំងការផ្សព្វផ្សាយនិងការរៀបចំធ្វើបដិសណ្ឋារកិច្ចកាន់តែល្អប្រសើរ កម្ពុជាបានក្លាយជាគោលដៅទាក់ទាញពីពលរដ្ឋជុំវិញពិភពលោក។ នេះបើតាម លោក ស៊ីន ចាន់សិរីវុត្ថា។
បន្ថែមពីនេះ លោក ស៊ីន ចាន់សិរីវុត្ថា បានបញ្ជាក់ថា ការត្រៀមរួចរាល់នៃវិស័យអាកាសចរណ៍ តាមរយៈការពង្រីកអាកាសយានដ្ឋានរបស់ប្រទេសកម្ពុជា ដែលបង្កលក្ខណៈងាយស្រួលអាចទទួលយន្តហោះធំៗហោះឆ្ងាយក៏ជាកត្តានាំក្រុមហ៊ុនអាកាសចរណ៍ធំជុំវិញពិភពលោក ដាក់គោលដៅកម្ពុជាក្នុងការពង្រីកអាជីវកម្មដឹកជញ្ជូន។
ដើម្បីជួយជំរុញដល់ការវិស័យអាកាសចរណ៍បន្ថែមទៀត រាជរដ្ឋាភិបាលកម្ពុជាបានដាក់ចេញវិធានការ រួមមានការអនុគ្រោះពន្ធផ្សេងៗ ដើម្បីឱ្យក្រុមអាកាសចរណ៍មានលទ្ធភាពហោះហើរដឹកជញ្ជូនដំណើរមកកាន់កម្ពុជាកាន់តែច្រើន។
ប្រមុខរាជរដ្ឋាភិបាលកម្ពុជាអះអាងថា រាជរដ្ឋាភិបាល នីតិកាលទី ៧ នៃរដ្ឋសភា នៅតែបន្តចាត់ទុកវិស័យទេសចរណ៍ ជាវិស័យអាទិភាព ដែលបានកំពុងដើរតួនាទីយ៉ាងសំខាន់ ក្នុងការរួមចំណែកដល់ការអភិវឌ្ឍសង្គម-សេដ្ឋកិច្ចជាតិ។
រាជរដ្ឋាភិបាលបានបញ្ចុះថ្លៃ VISA, ដាក់ចេញ e-VISA ក្នុងគោលដៅកាត់បន្ថយភាពកកស្ទះនៅអាកាសយានដ្ឋាន កាត់បន្ថយពន្ធសួយសារអាករ រៀបចំកញ្ចប់ផ្សេងៗ ដើម្បីបង្កភាពងាយស្រួលដល់វិស័យអាកាសចរណ៍ ទាក់ទាញភ្ញៀវទេសចរឱ្យមកកាន់ប្រទេសកម្ពុជា។
ថ្លែងនៅក្នុងពិធីបើកសន្និសីទចក្ខុវិស័យប្រទេសកម្ពុជា ឆ្នាំ២០២៥ ស្ដីពី «យុទ្ធសាស្ដ្រកំណើនថ្មីរបស់កម្ពុជា៖ អាទិភាពសម្រាប់ការអភិវឌ្ឍប្រកបដោយគុណភាព និងនិរន្ដរជាតិ» របស់វិទ្យាស្ថានបណ្ដុះបណ្ដាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ប្រមុខដឹកនាំកម្ពុជា សម្តេចធិបតី ហ៊ុន ម៉ាណែត បានលើកឡើងពីការដាក់ចេញយន្តការអនុគ្រោះពន្ធផ្សេងៗដើម្បីជួយស្រោចស្រង់វិស័យអាកាសចរណ៍ ក្រោយរងវិបត្តិជំងឺកូវីដ ១៩។
សម្ដេចធិបតី ហ៊ុន ម៉ាណែត បានរំលេចអំពីការជជែកគ្នាជាមួយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច ដើម្បីដោះស្រាយបញ្ហាក្នុងវិស័យអាកាសចរណ៍ដូច្នេះថា៖ «ជជែកជាមួយឯកឧត្ដម អគ្គបណ្ឌិតសភាចារ្យ វិស័យយន្តហោះរបស់យើង អញ្ចឹងយើងត្រូវថែមអីទៀតជួយគាត់? ទម្លាក់ពន្ធ កាត់ទុក ទម្លាក់អី ដើម្បីគាត់ជួយនៅក្នុងរយៈពេលប៉ុន្មាន ដើម្បីឱ្យគាត់ហោះបាន ប្រមូលទេសចរមក ដឹកធ្វើ charter flight អីទៅ»។
ក្នុងគោលបំណងជួយសម្រាលបន្ទុករបស់ក្រុមហ៊ុនអាកាសចរណ៍ ចំពោះការជួលយន្តហោះពីក្រៅប្រទេស ក៏ដូចជាដើម្បីជួយសម្រាលបន្ទុករបស់ប្រជាពលរដ្ឋ ក្នុងការធ្វើដំណើរតាមផ្លូវអាកាស ក្រសួងសេដ្ឋកិច្ច និងហិរញ្ញវត្ថុបានដាក់ឲ្យអនុវត្តការបន្ធូរបន្ថយពន្ធកាត់ទុក និងអាករពិសេសដល់ក្រុមហ៊ុនប្រតិបត្តិការសេវាអាកាសចរណ៍ក្នុងនោះ៖
១៖ បន្ថយអត្រាពន្ធកាត់ទុកពី ១៤ ភាគរយ មកត្រឹម ១០ ភាគរយ ចំពោះការជួលយន្តហោះ ពីក្រៅប្រទេសមកប្រកបអាជីវកម្មរបស់ក្រុមហ៊ុនអាកាសចរណ៍ក្នុងស្រុក។
២៖ បន្ថយអត្រាអាករពិសេសពី ១០ ភាគរយ មកត្រឹម ៥ ភាគរយ ចំពោះសេវាដឹកជញ្ជូនអ្នកដំណើរតាមផ្លូវអាកាស ដោយពុំគិតថា ការដឹកជញ្ជូនអ្នកដំណើរធ្វើឡើងដោយក្រុមហ៊ុនអាកាសចរណ៍ក្នុងស្រុក ឬក្រុមហ៊ុនអាកាសចរណ៍បរទេសឡើយ។
៣៖ ការអនុគ្រោះនេះ មានរយៈពេល ៣ឆ្នាំ គិតចាប់ពីថ្ងៃទី១ ខែមិថុនា ឆ្នាំ២០២៤ ដល់ ថ្ងៃទី៣១ ខែឧសភា ឆ្នាំ២០២៧៕
The post កម្ពុជាជាមុខព្រួយថ្មី ក្រោយក្រុមហ៊ុនអាកាសចរណ៍ធំៗចាប់ជាគោលដៅពង្រីកបណ្តាញហោះហើរបន្ថែម appeared first on Kampuchea Thmey Daily.
