កម្ពុជាបង្ហាញឆន្ទះលើ៧ចំណុចដើម្បីបញ្ឈប់អំពើហិង្សាលើកុមារជុំវិញ និងគ្រប់ទីកន្លែង

ថ្លែងក្នុងសន្និសីទពិភពលោកលើកទី១ ថ្នាក់រដ្ឋមន្រ្តីស្តីពីការបញ្ឈប់អំពើហិង្សានៅទីក្រុងបូកូតា ប្រទេសកូឡំប៊ី
ដែលមានតំណាងប្រទេសចូលរួមចំនួន ១១២ ប្រទេស លោកស្រី ញេប សុភាព រដ្ឋលេខាធិការ តំណាងដ៏ខ្ពង់ខ្ពស់លោក ជា សុមេធី រដ្ឋមន្រ្តីក្រសួងសង្គមកិច្ចអតីតយុទ្ធជន និងយុវនីតិសម្បទាបានលើកឡើងថា រាជរដ្ឋាភិបាលកម្ពុជាបានធ្វើការប្តេជ្ញាចិត្ត និងបង្ហាញឆន្ទះលើ៧ចំណុចដើម្បីបញ្ឈប់អំពើហិង្សាលើកុមារជុំវិញ និងគ្រប់ទីកន្លែងសំដៅលើកកម្ពស់សុខុមាលភាព និងកិច្ចការពារកុមារឱ្យកាន់តែប្រសើរ។

លោកស្រីបានបន្តថា ឆន្ទះលើ៧ចំណុចរួមមានទី១. ពង្រឹងប្រសិទ្ធភាពនៃការអនុវត្តអនុសញ្ញាស្តីពីសិទ្ធិកុមារ ច្បាប់ជាតិ
គោលនយោបាយ ផែនការ និងបទដ្ឋានគតិយុត្តពាក់ព័ន្ធដើម្បីលើកកម្ពស់សុខុមាលភាព និងកិច្ចការពារកុមារ ដូចជា គោលនយោបាយជាតិគាំពារសង្គម,គោលនយោបាយជាតិស្តីពីប្រព័ន្ធកិច្ចការពារកុមារ ជាដើម, ព្រមទាំងជំរុញការអនុម័តសេចក្តីព្រាងច្បាប់ស្តីពីកិច្ចការពារកុមារ និងផែនការជាតិស្តីពីការទប់ស្កាត់និងឆ្លើយតបចំពោះអំពើហិង្សាលើកុមារឆ្នាំ២០២៤-២០២៨ ។

ទី២. ពង្រឹង និងពង្រីកការអនុវត្តកម្មវិធីកិច្ចការពារកុមារនៅកម្ពុជា ដូចជា ការចិញ្ចឹមកូនបែបវិជ្ជមាន, ការដាក់ពិន័យបែបវិជ្ជានៅតាមសាលារៀន,កិច្ចការពារកុមារនៅតាមវត្តអារ៉ាម, និងកិច្ចការពារកុមារតាមប្រព័ន្ធអនឡាញជាដើមដើម្បីធានាថា កុមារត្រូវបានការពារ និងរស់នៅក្នុងបរិយាកាសមួយប្រកបដោយសុវត្ថិភាព។

ទី៣. ពង្រឹងប្រព័ន្ធប្រមូលទិន្នន័យនិងគ្រប់គ្រងកិច្ចការពារកុមារ ការវិភាគទិន្នន័យ និងការប្រើប្រាស់ទិន្នន័យសម្រាប់រៀបចំត្រួតពិនិត្យតាមដាន និងវាយតម្លៃគោលនយោបាយ ផែនការ និងកម្មវិធីជាតិ រួមទាំងអនុសញ្ញាស្តីពីសិទ្ធិកុមារ
និងគោលដៅអភិវឌ្ឍប្រកបដោយចីរភាព (SDG)។

ទី៤. ពង្រឹងសមត្ថភាពកម្លាំងសេវាសង្គម សម្រាប់ផ្តល់សេវាកិច្ចការពារកុមារ ជាអាទិ៍ កុមាររងគ្រោះដោយអំពើហិង្សា កុមារមានពិការភាព និងកុមារក្នុងស្ថានភាពរស់នៅ និងស្ថានភាពយេនឌ័រខុសៗគ្នា កុមារទំនាស់នឹងច្បាប់ ការមិនអើពើ ការរំលោភបំពានការជួញដូរ និងការគំរាមកំហែងគ្រប់រូបភាព ឱ្យបានទាន់ពេលវេលា និងមានប្រសិទ្ធភាពពីថ្នាក់​សហគមន៍​មូលដ្ឋាន ដល់ថ្នាក់ជាតិ រួមទាំងយន្តការវិធានការ ព្រមទាំងពង្រីកហេដ្ឋារចនាសម្ព័ន្ធបែបកុមារមេត្រី
ដែលឆ្លើយតបទៅនឹងតម្រូវការតាមស្ថានភាពនៃកុមារ ។

ទី៥. លើកកម្ពស់ និងពង្រឹងកិច្ចសហប្រត្តិបត្តិការពីគ្រប់ភាគីដែលពាក់ព័ន្ធក្នុងរាជរដ្ឋាភិបាលដោយប្រើប្រាស់យន្តការដែលមានស្រាប់ ដើម្បីលើកកម្ពស់សុខមាលភាពកុមារ និងកិច្ចការពារកុមារ ជាពិសេស ពង្រឹងយន្តការសម្របសម្រួល
ដើម្បីចាត់វិធានការទាន់ពេលវេលា និងតឹងរ៉ឹងដាច់ខាតចំពោះសកម្មភាពហិង្សាគ្រប់ទម្រង់លើកុមារ។

ទី៦. បង្កើនថវិកាជាតិសម្រាប់កុមារក្នុងក្របខណ្ឌគាំពារសង្គម និងសេវាសង្គមព្រមទាំង ការកៀរគរធនធានទាំងហិរញ្ញវត្ថុពីដៃគូ និងវិស័យឯកជនដើម្បីគាំទ្រនិងធានាចីរភាពនៃចលនាបញ្ចប់អំពើហិង្សាលើកុមារ ។

ទី៧. លើកកម្ពស់ការចូលរួមក្នុងការធ្វើឲ្យមានការផ្លាស់ប្តូរការគិត និងឥរិយាបទសង្គមពីគ្រប់ភាគីពាក់ព័ន្ធ ដូចជា រដ្ឋាភិបាល អង្គការមិនមែនរដ្ឋាភិបាល វិស័យឯកជនសាសនា គ្រួសារ សហគមន៍ ជាពិសេសកុមារ និងយុវជន ដើម្បីកសាងគ្រួសារ និងសង្គមមួយដែលមានសុវត្ថិភាព និងគ្មានអំពើហិង្សាលើកុមារ។

បញ្ជាក់បន្ថែមលើការប្តេជ្ញាចូលរួមបញ្ឈប់អំពើហិង្សាលើកុមារ លោកស្រីបណ្ឌិត សឿ សុជាតា តំណាងក្រសួងអប់រំយុវជននិងកីឡាបានចូលរួមធ្វើបទបង្ហាញស្តីពីសកម្មភាពនិងលទ្ធផលនៃការងារលើកកម្ពស់គុណភាពវិស័យអប់រំនិងបញ្ឈប់អំពើហិង្សាតាមរយៈកំណែទម្រង់វិស័យអប់រំ ដែលមានគោលនយោបាយជាតិស្តីពីសុខភាពសិក្សាគោល​នយោបាយស្តីពីកិច្ចការពារកុមារដែលតម្រូវឲ្យមានការចូលរួមពីគ្រប់ភាគីពាក់ព័ន្ធអនុវត្តប្រកបដោយប្រសិទ្ធភាពនិងទទួ
លខុសត្រូវគោលការណ៍សាលារៀនមួយ ជាតំបន់សុវត្ថិភាពនិងសុខដុមមួយ។

លោកស្រីបណ្ឌិតក៏បានបង្ហាញពីឆន្ទៈរបស់កម្ពុជាក្នុងការពង្រឹងបន្ថែមការអនុវត្តគោលការណ៍បញ្ឈប់ទណ្ឌកម្មគ្រប់ទម្រង់ក្នុងសាលារៀនតាមរយៈយន្តការអប់រំកូនបែបវិជ្ជមាន និងវិន័យបែបវិជ្ជមាន៕

អត្ថបទ៖ សំអឿន

The post កម្ពុជាបង្ហាញឆន្ទះលើ៧ចំណុចដើម្បីបញ្ឈប់អំពើហិង្សាលើកុមារជុំវិញ និងគ្រប់ទីកន្លែង appeared first on Kampuchea Thmey Daily.