កម្ពុជា និង២៦ប្រទេសទៀត ចូលរួមពិព័រណ៍ការពារអន្តរជាតិ នៅវៀតណាម ខែក្រោយ

តាមការចុះផ្សាយរបស់ VN Express នៅថ្ងៃអង្គារទី១៩ខែវិច្ឆិកាឆ្នាំ២០២៤ កម្ពុជានិងប្រទេសចំនួន២៦ទៀតបានចុះឈ្មោះ ចូលរួមពិព័រណ៍ការពារអន្តរជាតិ ដែលនឹងធ្វើឡើងនៅអាកាសយានដ្ឋាន Gia Lam ក្នុងទីក្រុងហាណូយនៃប្រទេសវៀតណាមចាប់ពីថ្ងៃទី១៩ដល់២២ខែធ្នូខាងមុខនេះ។

ឧត្តមសេនីយ៍ទោ Le Quang Tuyen អគ្គនាយករងនៃអគ្គនាយកដ្ឋានឧស្សាហកម្មការពារជាតិវៀតណាម បានឲ្យដឹងថា ពិព័រណ៍នេះមានការចូលរួមពីសំណាក់អង្គភាពនិងសហគ្រាសក្នុងស្រុកនិងបរទេសជិត២០០មកពីប្រទេសចំនួន២៧ ហើយក្រៅពីកម្ពុជា នៅមានប្រទេសគួរឲ្យចាប់អារម្មណ៍ផ្សេងទៀតដូចជា សហរដ្ឋអាមេរិក រុស្ស៊ី អង់គ្លេស បារាំង អេស្ប៉ាញ អ៊ីតាលី អាល្លឺម៉ង់ និងឥណ្ឌា ជាដើម។

យោងតាមលោក Le Quang Tuyen, ពិព័រណ៍នេះគឺជាឱកាសសម្រាប់ក្រសួងការពារជាតិពង្រីកកិច្ចសហប្រតិបត្តិការអន្តរជាតិ ការទូតការពារជាតិ និងកសាងទំនុកចិត្តរវាងវៀតណាមជាមួយប្រទេសនានាលើពិភពលោក។ នេះក៏ជាវេទិកាមួយដើម្បីចែករំលែកគោលនយោបាយ និងគោលការណ៍ណែនាំបរទេសផ្នែកការពារជាតិ, គោលនយោបាយកសាងកងទ័ព និងអភិវឌ្ឍន៍ឧស្សាហកម្មការពារជាតិផងដែរ។ ប្រទេស ក្រុមហ៊ុន និងសហគ្រាសក្នុងស្រុកនិងអន្តរជាតិនឹងមានឱកាសល្អដើម្បីណែនាំ និងបង្ហាញផលិតផល ហើយស្វែងរកឱកាសសហប្រតិបត្តិការ។

នៅឯការតាំងពិព័រណ៍នោះ ក្រុមហ៊ុនទាំងឡាយនឹងបង្ហាញរួចណែនាំសព្វាវុធ​ បច្ចេកវិទ្យាទំនើបៗ រថពាសដែក និងឧបករណ៍ប្រើប្រាស់សម្រាប់កងទ័ពជើងទឹក ជើងគោក និងការពារអាកាស។

សូមបញ្ជាក់ថា ក្នុងឆ្នាំ២០២២ វៀតណាម បានរៀបចំព្រឹត្តិការណ៍នេះជាលើកដំបូង ដោយកាលនោះមានការចូលរួមពីសំណាក់ក្រុមហ៊ុនចំនួន១៧៥ មកពី៣១ប្រទេស៕

អត្ថបទ៖ សុខ សុវណ្ណ

ចុចអាន៖ យន្តហោះ​យោធាធ្លាក់​នៅ​វៀតណាម បាត់​ខ្លួន​អ្នក​បើក​២​នាក់

The post កម្ពុជា និង២៦ប្រទេសទៀត ចូលរួមពិព័រណ៍ការពារអន្តរជាតិ នៅវៀតណាម ខែក្រោយ appeared first on Kampuchea Thmey Daily.