លោក ត្រាំ តែងតាំងបុគ្គលប្រឆាំងអ៊ីរ៉ង់ ឲ្យកាន់តំណែងជាឯកអគ្គរដ្ឋទូតប្រចាំ UN

ប្រធានាធិបតីជាប់ឆ្នោតអាមេរិក លោក ដូណាល់ ត្រាំ បានតែងតាំងអ្នកស្រី Elise Stefanik ដែលជាសម្ព័ន្ធមិត្តដ៏រឹងមាំរបស់អ៊ីស្រាអែល និងជាអ្នកប្រកាន់គោលនយោបាយការបរទេសយ៉ាងម៉ឺងម៉ាត់ប្រឆាំងអ៊ីរ៉ង់ ឲ្យកាន់តួនាទីជាឯកអគ្គរដ្ឋទូតប្រចាំអង្គការសហប្រជាជាតិថ្មី។

ដូច្នេះអ្នកស្រី Stefanik ដែលជាសមាជិកសភាមកពីទីក្រុងញូវយ៉ក នឹងត្រូវជំនួសតំណែងអ្នកការទូតអាជីព Linda Thomas-Greenfield ដែលតំណាងឲ្យសហរដ្ឋអាមេរិកនៅ UN អស់រយៈពេល៣ឆ្នាំមកហើយ។

ក្នុងការបង្ហោះនៅលើបណ្តាញសង្គម X កាលពីថ្ងៃចន្ទទី១១ខែវិច្ឆិកាឆ្នាំ២០២៤ អ្នកស្រី Stefanik បានសរសេរថា «សហរដ្ឋអាមេរិកត្រៀមខ្លួនជាស្រេច សម្រាប់ការវិលត្រឡប់ទៅរកយុទ្ធនាការដាក់សម្ពាធខ្លាំងបំផុតរបស់លោកប្រធានាធិបតី ត្រាំ ប្រឆាំងនឹងអ៊ីរ៉ង់។ ទីក្រុងតេហេរ៉ង់ ប្រហែលរឹងមាំខ្លាំងណាស់ហើយមើលទៅ ដោយសារតែភាពទន់ខ្សោយរបស់រដ្ឋបាល បៃដិន-ហារីស»។

អ្នកស្រី Stefanik គឺជាអ្នកគាំទ្រអ៊ីស្រាអែលដ៏ខ្លាំងក្លា ក្នុងសង្រ្គាមប្រឆាំងក្រុមហាម៉ាសនៅតំបន់ហ្គាហ្សា និងការវាយប្រហារតាមអាកាសប្រឆាំងក្រុមហេសបូឡានៅលីបង់។ អ្នកស្រីក៏គាំទ្រការសម្រេចចិត្តរបស់ទីក្រុងហ្ស៊េរុយសាឡិមខាងលិច ក្នុងការហាមឃាត់ទីភ្នាក់ងារជំនួយនិងការងាររបស់អង្គការសហប្រជាជាតិសម្រាប់ប៉ាឡេស្ទីន «UNRWA» ផងដែរ។

សូមបញ្ជាក់ថា ក្នុងអាណត្តិដំបូងរបស់លោក ត្រាំ សហរដ្ឋអាមេរិកបានលុបចោលកិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ២០១៥ និងបង្កើនការដាក់ទណ្ឌកម្មប្រឆាំងនឹងសាធារណរដ្ឋឥស្លាមមួយនេះ ហើយនៅខែមករាឆ្នាំ២០២០ មេទ័ពអ៊ីរ៉ង់លោក Qassem Soleimani ក៏ត្រូវបានសម្លាប់ទៀត នៅក្នុងការវាយប្រហារដោយយន្តហោះគ្មានមនុស្សបើកអាមេរិក នៅជិតអាកាសយានដ្ឋានទីក្រុងបាកដាដនៃប្រទេសអ៊ីរ៉ាក់។

សេតវិមានបានចោទលោក Soleimani ពីបទរៀបចំការវាយប្រហារលើយោធាអាមេរិក និងជនស៊ីវិលនៅក្នុងប្រទេសអ៊ីរ៉ាក់ និងស៊ីរី។ ប៉ុន្តែទោះជាយ៉ាងណាក៏ដោយ ទីក្រុងតេហេរ៉ង់ បានថ្កោលទោសការវាយប្រហារនេះថា ខុសច្បាប់ក្រោមច្បាប់អន្តរជាតិ៕

អត្ថបទ៖ សុខ សុវណ្ណ

ចុចអាន៖ លោក ត្រាំ តែងតាំងបុគ្គលដំបូងគេ ក្នុងរដ្ឋាភិបាលថ្មី, បង្កើតប្រវត្តិសាស្រ្តអាមេរិក

The post លោក ត្រាំ តែងតាំងបុគ្គលប្រឆាំងអ៊ីរ៉ង់ ឲ្យកាន់តំណែងជាឯកអគ្គរដ្ឋទូតប្រចាំ UN appeared first on Kampuchea Thmey Daily.