រដ្ឋបាល បៃដិន នឹងសម្រុកផ្តល់ជំនួយឲ្យអ៊ុយក្រែន ទុកប្រយុទ្ធជាមួយរុស្ស៊ី នៅឆ្នាំក្រោយ
រដ្ឋមន្ត្រីការបរទេសសហរដ្ឋអាមេរិក លោក Antony Blinken កាលពីថ្ងៃព្រហស្បតិ៍ទី១៤ខែវិច្ឆិកាឆ្នាំ២០២៤ បានបញ្ជាក់ថា ប៉ុន្មានខែចុងក្រោយនៃ... The post រដ្ឋបាល បៃដិន នឹងសម្រុកផ្តល់ជំនួយឲ្យអ៊ុយក្រែន ទុកប្រយុទ្ធជាមួយរុស្ស៊ី នៅឆ្នាំក្រោយ appeared first on Kampuchea Thmey Daily.
រដ្ឋមន្ត្រីការបរទេសសហរដ្ឋអាមេរិក លោក Antony Blinken កាលពីថ្ងៃព្រហស្បតិ៍ទី១៤ខែវិច្ឆិកាឆ្នាំ២០២៤ បានបញ្ជាក់ថា ប៉ុន្មានខែចុងក្រោយនៃរដ្ឋបាលលោក ចូ បៃដិន, ទីក្រុងវ៉ាស៊ីនតោន នឹងសម្រុកផ្តល់ជំនួយតាមដែលអាចធ្វើទៅបានដើម្បីធានាថា អ៊ុយក្រែនរឹងដៃរឹងជើង អាចបន្តប្រយុទ្ធជាមួយរុស្ស៊ីនៅឆ្នាំក្រោយទៀត។
លោក Blinken និយាយថា «ប្រធានាធិបតី បៃដិន បានប្តេជ្ញាចិត្តយ៉ាងមុតមាំ ដោយធានាថា រាល់ប្រាក់ដុល្លារដែលយើងមាន នឹងត្រូវបញ្ចេញចាប់ពីពេលនេះដល់ថ្ងៃទី២០ខែមករា នៅពេលប្រធានាធិបតីជាប់ឆ្នោត ដូណាល់ ត្រាំ ត្រូវស្បថចូលកាន់តំណែង»។
អំឡុងដំណើរទស្សនកិច្ចទៅកាន់ទីក្រុង ព្រុចសែល នៃប្រទេសបែលហ្ស៊ិក លោក Blinken លើកឡើងថា រដ្ឋជាសមាជិកអង្គការណាតូ ត្រូវតែខិតខំឲ្យខ្លាំងមែនទែនដើម្បីធានាថា អ៊ុយក្រែនមានប្រាក់ គ្រាប់បែក និងកម្លាំងចល័ត ដើម្បីប្រយុទ្ធប្រកបដោយប្រសិទ្ធភាពក្នុងឆ្នាំ២០២៥។
កាលពីសប្តាហ៍មុន ក្នុងបទសម្ភាសដែលចេញផ្សាយដោយទូរទស្សន៍ CBS ទីប្រឹក្សាសន្តិសុខជាតិអាមេរិកលោក Jake Sullivan ក៏បញ្ជាក់ដែរថា សេតវិមាននឹងបញ្ចេញកញ្ចប់ជំនួយនៅសល់ប្រមាណ៦ពាន់លានដុល្លារទៀតឲ្យទៅអ៊ុយក្រែន មុនពេលលោក ត្រាំ ឡើងកាន់តំណែងជាផ្លូវការក្នុងខែមករាឆ្នាំ២០២៥។
លោក Sullivan លើកឡើងថា «គោលដៅសំខាន់មួយក្នុងចំណោមគោលដៅសំខាន់ៗរបស់រដ្ឋបាលបៃដិន នារយៈពេលប៉ុន្មានខែចុងក្រោយនៃអាណត្តិរបស់គាត់ គឺត្រូវធ្វើឲ្យអ៊ុយក្រែនឈរជើងក្នុងទីតាំងដ៏រឹងមាំបំផុតលើសមរភូមិ ដើម្បីធានាថា ពួកគេជាភាគីមិនអាចខ្វះបាន នៅពេលចូលមកកាន់តុចរចា»។
ចាប់តាំងពីរុស្ស៊ីបើកប្រតិបត្តិការសឹកពេញទំហឹងលើអ៊ុយក្រែនក្នុងខែកុម្ភៈឆ្នាំ២០២២មក សហរដ្ឋអាមេរិក បានជួយផ្នែកយោធាអស់ទឹកប្រាក់១៧៤ពាន់លានដុល្លារហើយ ប៉ុន្តែជំនួយនេះ ត្រូវក្រុមអ្នកសាធារណរដ្ឋរិះគន់យ៉ាងខ្លាំង ដោយមានអ្នកខ្លះចោទថា រដ្ឋាភិបាលលោក ចូបៃដិន ហាក់ដូចជាយកលុយវាល់លានទៅបោះចោលនៅអ៊ុយក្រែន អ៊ីចឹង។
ដូច្នេះហើយទើប ឥឡូវទីក្រុងកៀវ កំពុងភ័យខ្លួនចំពោះការជាប់ឆ្នោតរបស់លោក ដូណាល់ ត្រាំ ហើយសូម្បីរុស្ស៊ីក៏គំរាមដែរថា ការជាប់ឆ្នោតប្រធានាធិបតីទី៤៧របស់សហរដ្ឋអាមេរិក គឺជាដំណឹងដ៏អាក្រក់បំផុតសម្រាប់លោក វ្ល៉ាឌីមៀរ ហ្សេលេនស្គី៕
អត្ថបទ៖ សុខ សុវណ្ណ
ចុចអាន៖ អាមេរិក សន្យាជួយអ៊ុយក្រែន ៦ពាន់លានដុល្លារទៀត មុនលោក ត្រាំ ឡើងកាន់តំណែង
The post រដ្ឋបាល បៃដិន នឹងសម្រុកផ្តល់ជំនួយឲ្យអ៊ុយក្រែន ទុកប្រយុទ្ធជាមួយរុស្ស៊ី នៅឆ្នាំក្រោយ appeared first on Kampuchea Thmey Daily.
