បង្ក្រាបទីតាំងអគារមួយកន្លែងពាក់ព័ន្ធល្បែង​អនឡាញខុសច្បាប់ ឃាត់ខ្លួនជនបរទេស ជិត​២០០នាក់

កម្លាំងនគរបាលនៃអគ្គស្នងការដ្ឋាននគរបាលជាតិ បានចុះបង្ក្រាប និងឃាត់ខ្លួនជនបរទេសជិត២០០នាក់ នៅក្នុងអគារមួយកន្លែង ស្ថិតនៅសង្កាត់ស្ទឹងមានជ័យ៣ ខណ្ឌមានជ័យ ពាក់ព័ន្ធបទល្មើសល្បែងអនឡាញខុសច្បាប់ និងបង្ខាំងមនុស្ស។

ប្រតិបត្តិការចុះបង្ក្រាបនេះ បានធ្វើឡើងកាលពីរសៀលថ្ងៃទី៦ ខែវិច្ឆិកា ឆ្នាំ២០២៤ ក្រោយពីកម្លាំងជំនាញបានទទួលព័ត៌មានពីជនរងគ្រោះនៅក្នុងអគារនេះ។

ក្នុងប្រតិបត្ដិការនេះ ក្រោមការដឹកនាំដោយលោកឧត្ដមសេនីយ៍ឯក ស៊ាង ធារិទ្ធ អគ្គស្នងការរងនគរបាលជាតិ ក្រោមការបញ្ជាពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងនាយឧត្ដមសេនីយ៍ ស ថេត អគ្គស្នងការនគរបាលជាតិ។

ក្រោយទទួលបានទទួលព័ត៌មានពីជនរងគ្រោះ ដែលបានប្តឹងថាត្រូវចាប់បង្ខាំងនៅក្នុងអគារនេះ កម្លាំងជំនាញបានទទួលបទបញ្ជាពីឧបនាយករដ្ឋមន្ដ្រី ស សុខា និងនាយឧត្ដមសេនីយ៍ ស ថេត កម្លាំងបានចុះទៅដល់ទីតាំងសង្ស័យពាក់ព័ន្ធនឹងបទល្មើសល្បែងអនឡាញ ព្រមទាំងរកឃើញជនជាតិចិន និងប៉ាគីស្ថាន ជិត២០០នាក់ ដែលមានភាគច្រើនជាជនជាតិចិន។

ជនជាតិបរទេសទាំងនោះ ត្រូវបានឃាត់ខ្លួនដើម្បីបន្ដនីតិវិធីតាមផ្លូវច្បាប់ ដោយឡែកអ្នកពាក់ព័ន្ធ និងម្ចាស់ទីតាំង សមត្ថកិច្ចកំពុងបន្ដនីតិវិធីតាមផ្លូវច្បាប់បន្ដទៀត៕

អត្ថបទ៖ សុភា

The post បង្ក្រាបទីតាំងអគារមួយកន្លែងពាក់ព័ន្ធល្បែង​អនឡាញខុសច្បាប់ ឃាត់ខ្លួនជនបរទេស ជិត​២០០នាក់ appeared first on Kampuchea Thmey Daily.