កម្ពុជា-ហូឡង់ ប្តេជ្ញាពង្រឹង កិច្ចសហប្រតិបត្តិការ នយោបាយ និងសេដ្ឋកិច្ច ឲ្យកាន់តែស៊ីជម្រៅ

ភ្នំពេញ ៖ កម្ពុជា និងហូឡង់ បានអះអាងសារជាថ្មីនូវការប្តេជ្ញាចិត្តរួមគ្នា ក្នុងការជំរុញទំនាក់ទំនងទ្វេភាគី និងពង្រឹងកិច្ចសហប្រតិបត្តិការនយោបាយ និងសេដ្ឋកិច្ច ឲ្យកាន់តែស៊ីជម្រៅ ដើម្បីផលប្រយោជន៍ នៃប្រជាជាតិទាំងពីរ ។

ការប្ដេជ្ញាចិត្តនេះធ្វើឡើង នៅថ្ងៃទី១៣ ខែវិច្ឆិកា ឆ្នាំ២០២៤ ក្នុងជំនួបរវាងឧបនាយករដ្ឋមន្ត្រី សុខ ចិន្តាសោភា រដ្ឋមន្ត្រីក្រសួងការបរទេសកម្ពុជា និងលោក Remco Johannes van Wiljngaarden ឯកអគ្គរាជទូតហូឡង់ប្រចាំកម្ពុជា ។

ក្នុងជំនួបនេះដែរ ភាគីទាំងពីរបានពិភាក្សាប្រកបដោយអត្ថន័យ ដោយបានគូសបញ្ជាក់អំពី ទំនាក់ទំនងទ្វេភាគីដ៏យូរលង់ រវាងកម្ពុជា និងហូឡង់ ព្រមទាំងបានអះអាងសារជាថ្មីនូវ ការប្តេជ្ញាចិត្តរួមគ្នាក្នុងការជំរុញទំនាក់ទំនងនេះ និង ពង្រឹងកិច្ចសហប្រតិបត្តិការទ្វេភាគី ដើម្បីផលប្រយោជន៍ នៃប្រជាជាតិទាំងពីរ។ ភាគីទាំងពីរបានកត់សម្គាល់ ដោយការពេញចិត្ត ពីភាពជោគជ័យ នៃការរៀបចំកិច្ច ពិគ្រោះយោបល់លើកទី១ នៅទីក្រុងឡាអេ កាលពីឆ្នាំមុន និងត្រៀមខ្លួន ក្នុងការរៀបចំកិច្ចពិគ្រោះយោបល់លើកទី២ នៅកម្ពុជា នៅឆ្នាំក្រោយ។

លោកឧបនាយករដ្ឋមន្ត្រី បានគូសបញ្ជាក់ពីការយកចិត្តទុកដាក់ យ៉ាងមុតមាំរបស់កម្ពុជា លើការអភិវឌ្ឍន៍ សង្គម-សេដ្ឋកិច្ច ដោយបានស្វាគមន៍ការវិនិយោគ នៅគ្រប់កម្រិតពីប្រទេសហូឡង់ ព្រមទាំងបានបញ្ជាក់ឡើងវិញ ពីការប្តេជ្ញាចិត្តរបស់កម្ពុជា ក្នុងការបង្កើតបរិយាកាសវិនិយោគ ប្រកបដោយអំណោយផល។ លោក ក៏បានចែករំលែកអំពីវឌ្ឍនភាពនៃ ការអភិវឌ្ឍរបស់ប្រទេសកម្ពុជា រួមទាំងការបញ្ចប់ឋានៈជាប្រទេសអភិវឌ្ឍន៍តិចតួច (Least Developed Country) ក្នុងឆ្នាំ២០២៩ ក៏ដូចជាការយកចិត្តទុកដាក់របស់ រាជរដ្ឋាភិបាលចំពោះការអភិវឌ្ឍធនធានមនុស្ស និងទំនើបបកម្មបច្ចេកវិទ្យា នៅក្នុងយុទ្ធសាស្ត្របញ្ចកោណ របស់រាជរដ្ឋាភិបាលកម្ពុជា ដែលជាគោលដៅដ៏សំខាន់ ក្នុងការអភិវឌ្ឍន៍ជាតិផងដែរ ។

លោកទូតហូឡង់ បានសង្កត់ធ្ងន់លើការប្តេជ្ញាចិត្តរបស់ ប្រទេសហូឡង់ក្នុងការគាំទ្រ ធុរកិច្ចហូឡង់នៅកម្ពុជា ជាពិសេសក្នុងវិស័យអភិវឌ្ឍន៍ប្រកបដោយចីរភាព ដែលនឹងចូលរួមចំណែកដល់អាទិភាព អភិវឌ្ឍន៍សំខាន់ៗនៅកម្ពុជា ដូចជាតាមរយៈការពង្រឹងធនធានមនុស្ស។ ភាគីទាំងពីរក៏បានចែករំលែកទស្សនៈ ស្តីពីបញ្ហាតំបន់ និងអន្តរជាតិ ដែលជាកង្វល់រួមផងដែរ ៕